KALIBO, Aklan–Padayun ro pagtinaas it numero it mga insidente it hate crimes sa Estados Unidos.
Raya ro ginkumpirma ni Bombo International Correspondent Greg Aguilar it California, USA sa interview it Bombo Radyo Kalibo.
Suno kana, nag-umpisa ro pagtaas it hate crimes sa Amerika sa kasagsagan it COVID-19 pandemic ko 2020.
Masami sigon nga ginabasoe it mga Amerikano sa mga Asyano ro pag-inabu it kaso it infection sa andang nasyon.
Raya hay bangud nga idtu sa nasyon it China nadiskubrehan ro unang kaso it COVID-19.
Agud nga malikawan ro mas pang pag-abu it hate crimes, nagplastar ro Office of the Attorney General it Amerika it pilang ka sueondanan para magtutuk sa mga kinagamo.
Madumduman nga ro pinakaulihing natabo nga hate crimes hay sa sueod it supermarket sa Buffalo, New York kung siin kapin sa napueong katawo ro patay ag tatlo ro naninahan matapos nga ginbaril it sangka 18-anyos nga eaeaki.
Kaabuan sa mga biktima hay African-American nga nagapamakae eamang kunta sa sueod it establisyemento.
