KALIBO, Aklan–Sobra eon ro kalisod nga ginapangatubang it mga mangingisda matapos ro kada dominggo nga pagtaas sa presyo it kada litro it produktong petrolyo.
Suno kay Joy Camallere, masami nga haeos owa eon sanda it ginakita halin sa pagpangisda bangud sa masyadong mataas nga presyo it krudo ag gasolina.
Mabahoe sigon nga kalugian ro tuga kanda it sigidas nga oil price hike.
Owa sigon sanda it mahimo kundi padayun nga magbakae it langis apisar nga nagakuliit eon sanda bangud sambilog raya sa nagapangunang kinahang-eanon sa andang operasyon.
Sa pihak nga parte, nagpanawagan man ro asawa kara nga si Amy Joy Camallere nga dapat masolusyonan eon it gobyerno ro pagtinaas it petrolyo.
Kaeabanan sigon sa mga kaibahan it anang asawa hay naga-utang eon sa mga lending agud nga may pang gastos sa gasolina.
Swerte eon sigon kung makadakop sanda it bastanteng isda para may mai-uli nga sangkiri nga kita sa andang natungdan nga pamilya.
Ginasaligan man sigon nanda ro ayuda halin sa gobyerno agud nga maskin paalin hay mabawasan ro epekto it oil price increase.
