KALIBO, Aklan—Kadungan it ika-44 nga anibersaryo it implementasyon it Comprehensive Agrarian Reform Program, nagpatigayun it hub-eag protesta ro grupo it Bagong Alyansang Makabayan ukon Bayan-Aklan kaibahan ro nagkaeain-eain nga sektor sa atubang it Department of Trade and Industry (DTI) ko Hunyo 10.
Ginpahayag ni Kim Sin Tugna, OIC Coordinator it Bayan-Aklan nga tuyo it protesta nga mapukaw ro igtueopangod it ahensya sa tunga it pagtaas it presyo it mga nagapangunang baeak-eon ag serbisyo sa nasyon.
Gusto eamang sigon nanda nga ipaabot ro andang sentimiyemento agud nga mabawasan ro kalisod nga ginapas-an it mga ordinaryong pumueoyo nga apektado it sigidas nga pagtaas it petrolyo kung siin nagtuga it domino effect sa maabu nga mga produkto.
Dapat sigon nga maghimo it pamaagi ro DTI para mapunggan ro padayun nga pagsipa it presyo ag pabaskugon ro monitoring sa mga establisyemento.
Sa rayang pamaagi suno kana hay malikawan ro pag-abuso ag pagpamintaha it mga negosyante sa presenteng sitwasyon.
