KALIBO, Aklan–Nagpaabot it pilang ka mga mensahe si outgoing Sangguniang Panlalawigan member Atty. Harry Sucgang angot sa anang mga naipasa nga ordinansa ag eksperyensya sa sueod it pilang dag-on nga pagserbisyo sa mga pumueoyong Aklanon.
Ginpahayag ni Atty. Sucgang nga maabu imaw nga mga legasiya nga nahimo kaeakip ro pagpasar it sangka ordinansa angot sa mandatory nga pagsuksok it face mask nga hasta sa makaron hay padayun nga ginasakdag.
Sa pihak kara, may mga ginpakigbahin man si Atty. Sucgang nga mga makasueobo nga eksperyensya eabi eon ro medyo diskriminasyon sa bahin it mga taga oposisyon.
Gintaw-an kara it punto ro bukon it patas nga pagtratar ag owa pagtao kanda it pondo it gobernador para gamiton sa pilang ka mga proyekto.
Partikular nga gintumod kara ro P1.7 million halin sa opisina it gobernador nga ginatao sa anang mga kaibahan nga board member kada dag-on.
Dapat sigon nga makaangkon it check and balance agud nga maging patas ro daeagan sa sueod it opisina.
Aminado si Atty. Sucgang nga malisod kung sangkiri ro miyembro it opposition bangud mabudlay nga magduso it pilang ka mga ordinansa ukon resolution.
Ginpahayag dugang nga ro papel it Sangguniang Panlalawigan hay bantayan ro tama nga paggastos it kwarta it probinsya.
