KALIBO, Aklan–Gin-engganyo it Municipal Planning and Development Office (MPDO) ro mga interesadong indibidwal nga mag-apply sa andang opisina bilang Community Based Monitoring System (CBMS) enumerators, supervisor ag mapper.
Raya hay kasunod it ginpirmahan nga sangka memorandum of agreement it lokal nga gobyerno it Kalibo sa tunga it Philippine Statistics Authority (PSA).
Suno kay Municipal Planning Coordinator Engr. Marlo Villanueva nga sigidas makaron ro andang pagbaton it aplikasyon sa mga kwalipikadong aplikante sa mga natungdan nga posisyon.
Kabilugan nga 117 nga katawo sigon ro andang target kung siin naga-abot eon sa 70 ka mga aplikante ro nagdangop sa andang opisina.
Nasayuran nga sambilog ro banwa it Kalibo sa gin-aprubahan it PSA nga maghimo it CBMS.
Target sigon nanda nga matapos ro pag-proseso it aplikasyon sa ikatlong dominggo it Hunyo.
Ro mga kwalipikadong job applicant hay nakataeana nga magbuoe it eksaminasyon, magpaidaeom sa interview ag maidid nga screening.
Ro opisyal nga pag-umpisa it trabaho hay sa maabot nga buean it Hulyo kung siin may igapatigayun man sanda nga orientation ag training.
Ginpahayag pa ni Engr. Villanueva nga ro trabaho bilang CBMS enumerators hay bukas sa tanan nga mga senior high school graduate.
Samtang, kinahang-ean man it good leadership, may eksperyensya sa pagsurvey ag pamilyar sa lugar ro mga gustong mag-apply para sa supervisor nga posisyon.
Sa oras nga maumpisahan eon ro implementasyon kara, dapat nga maabot it kada enumerators ro napueong ka mga household kada adlaw.
Ro trabaho hay ginabuebanta nga magabuhay it hasta tatlong buean.
Ro kada enumerator hay sarang magbaton it kapin sa P400 nga sweldo kada adlaw ag transportation allowance.
Nasayuran nga kada tatlong dag-on kinahang-ean nga magpatigayun it CBMS survey it lokal nga gobyerno.
Ginpunto pa kara nga mabahoe ro maibublig it mga mabuoe nga data ag impormasyon sa kada pamilya.
Samtang, gin-engganyo man kara ro iba pang interesadong pumueoyo nga makipag-angot sa andang opisina para sa dugang nga mga pangutana.
