KALIBO, Aklan–Mas pang nadugangan ro kalisod nga ginapangatubang it mga ordinaryong pumueoyo bangud sa uman nga pagtaas it presyo it produktong petrolyo umpisa makaron nga adlaw it Martes.
Suno kay Jhon Lord Tabiolo, pump boy it Gas ‘N’ Go Gasoline Station nga makabig eon nga masyadong masakit sa buesa ro haeos kada dominggo nga pagsaka sa presyo it langis.
Suno kana, mas mayad pa kung magpanakayon eon lang makaron nga tyempo kaysa magdaea it kaugalingon nga behikulo bangud owa pa nakaangkon it paghueag sa presyo it pamasahe sa mga pampublikong transportasyon.
Umpisa sigon kainang agahon nagpasaka ro andang komppaniya it 80 sentimos sa kada litro it gasolina ag haeos tatlong piso sa diesel.
Bangud kara, nagabalor eon makaron it P86.35 ro kada litro it unleaded samtang P86.45 ro premium ag P89.95 ro diesel.
Agud nga makatipid, dapat sigon nga bawasan anay ro pagpinanaw eabi eon kung bukon it importante.
Sa pihak nga parte, may ginatanyag man nga raffle ticket ro andang kompaniya sa mga motorista nga magapatayon it worth P200 nga gasolina ukon diesel.
Hasta pa sigon it Hunyo 30 ro paghueog it mga raffle entry kung siin ro grand draw hay pagahiwaton sa Hulyo 2.
Nasayuran nga sangka brand new nga motorsiklo ro pwedeng mai-uli it grand prize winner.
Mag-euwas kara, may pagaeauman man sigon nga premyo ro 2nd ag 3rd prize winner kamana man nga may ginatao sanda nga consolation prize.
