Nagataas eon man ro kaso it COVID-19 base sa datos nga nabo-oe it Department of Health (DOH).
Ko nagtaliwan nga domingo, nakalista ro DOH it 435 nga bag-ong kaso it COVID—pinakamataas umpisa ko nagtaliwan nga Abril 3.
Sa sueod it daywang domingo, nakalista ro National Capital Region (NCR) it 1,761 nga bag-ong kaso.
Pinakamataas sa tanan nga rehiyon.
Masunod ro Calabarzon nga may 518 kaso; Central Luzon, 277; Western Visayas, 266 ag Central Visayas, 136.
Sa pihak kara, ginpahayag it DOH nga nagapabilin nga una sa “low risk” classification ro Metro Manila.
Maskin nga ginhambae it DOH nga una sa low risk ro Metro Manila, raya hay owa man nagakahueugan nga maging kampante eon ag balewalaon ro health protocols nga ginapatuman kapareho it physical distancing, pagsuksok it face mask, paghugas it alima ag paglikaw sa mga matawong lugar.
Una pa sa palibot ro virus rason nga indi dapat nga magrelaks ro mga pumueuyu.
Sa makaron, balik eon sa mga dating nakasanayan nga pagselebrar it birthday sa kalye kun sa siin may naga-karaoke ag naga-inuman it aeak nga sangka baso eamang ro ginagamit.
Sa makarondaya nga mga pagtililipon madasig nga nagakalhit ro virus ag sa gulpiyada, bilog nga barangay eon ro infected.
Kon makarondaya ro matabu, balik eon man sa lockdown.
Indi pa dapat nga boe-on ro pagsuksok it face mask bangud nga nagakalhit pa ro COVID.
Kon pagaboe-on ro proteksiyon sa ilong ag bibig makasagap it virus ag magataeapnan.
Ro dapat nga obrahon it local officials, engganyuhon nga magpabakuna ag magpa-booster ro mga nasakupan.
Indi magmadali sa pagbo-oe it face mask.
Eubus pang delikado.
