Nagpatawag it unang executive meeting si mayor Juris Bautista sa tanan nga department heads it lokal nga gobyerno it Kalibo.
Suno kay Kagawad Mark Sy, raya hay para masayuran ro mga problema ag kinahang-eanon it kada departamento sa sueod it munisipyo antes nga magtrabaho ro alkalde sa guwa.
Pila sa mga gintalakay sa pueong hay ro hinyo it sangguniang bayan nga maisaylo eon ro session hall sa 3rd floor it bag-ong building it municipal hall ag ro kakueangan it tawo sa kada departamento bangud sa pagtapos eon man it termino it mga job orders.
Mag-eowas kara, plano it alkalde nga LGU eon ro mabuyot sa pagdumaea sa Ati-atihan festival kon siin uwa eon it foundation ukon organisasyon nga magamanehar kara.
Sa makaron sigon hay una pa sanda sa transition period apang ginpasiguro it office of the mayor nga maging maugan ro tanan para sa mga empleyado agud nga maumpisahan eon man ro pagpanerbisyo sa publiko it bag-ong administrasyon.
