KALIBO, Aklan—Nag-umpisa eon nga magpangabuhi sa “new normal” stage ro mga pumueoyo it Australia.
Raya hay sa pihak nga padayun gihapon nga nakakalista ro nasyon it libo-libong kaso it COVID-19 kada adlaw.
Suno kay Bombo International Correspondent Denmark Suede it Sydney, Australia nga naga-abot eon sa 84 porsyento it andang eligible population ro nabakunahan kontra COVID-19 kung siin 70 porsyento eon ro nakabaton it booster shot.
Owa sigon masyadong nagakabaeaka ro andang gobyerno ag health authorities bangud mayorya sa andang populasyon hay bakunado eon.
Gin-insister pa kara nga mabahoe ro maibulig it pagpabakuna sa pag-angkon it dugang nga proteksyon sa eawas ag paglikaw sa infection.
Sa makaron, batyag eon sigon ro amat-amat nga paghaeuga sa andang nasyon.
