NATIONAL News — Nagtaas it sangkiri ro turnout it mga aplikante sa unang adlaw it nagpadayun nga voter registration sa bilog nga nasyon.
Suno sa Commission on Elections (Comelec) nga base sa andang initial assessment reports halin sa mga field office, ro unang adlaw it voter’s registration kahapon nga adlaw it Lunes hay naging matawhay ag maayos.
Kaabuan sigon sa mga aplikante hay kaibahan sa mga bag-ong miyembro it Katipunan ng Kabataan-Sangguniang Kabataan, nga may edad 15 hasta 17 anyos.
Sa idaeum it Comelec Resolution 10798, tanan nga field offices hay kinahangean nga magsumite it daily reports nga indi mag-eampas sa alas 7:00 it gabi-i ag tanan nga rehiyon hay dapat magsumite it andang mga report sa Election and Barangay Affairs Department it poll body.
Ro nagapadayun nga voter registration hay magabuhay hasta sa Hulyo 23, 2022.
Ro pagpa-rehistro hay Lunes hasta it Sabado kaibahan ro pista opisyal, umpisa alas-8 it agahon hasta alas-5 it hapon sa tanan nga Comelec City ag Municipal Offices nga may satellite ag off-site registrations nga pagahiwaton nga may nagakaigo nga abiso agud nga mapadali ro mas maabung aplikasyon.
Nauna eon nga ginpaathag it Comelec nga ro nagapadayun nga voter registration hay pagahiwaton nga owa pa it sang buean sa idaeum it Republic Act 8189 ukon ro Continuing Voter’s Registration Act nga nagabawae sa voter registration sa sueod it 120 diyas antes ro eleksyon.
Gintaeana ro eleksyon para sa Barangay ag SK election sa Disyembre 5, 2022.
Ginpahayag dugang nga may una nga post-registration activities ag requirements nga kinahangean nga iproseso it poll body antes ro masunod nga eleksyon.
