Ginadihon sa makaron it sangka mamalidha ro pagtao it special economic powers kay Pangueong Ferdinand Marcos Jr.
Raya hay para makontrol ro hoarding it essential items, mapangunahan ro problema sa transportasyon, maimbestigahan ro market abuse sa energy sector ag mapaeawig ro pautang sa mga negosyo nga nagahimu it essential goods.
Sa pakig-istorya ni Albay 2nd district Rep. Jose Ma. Salceda kay presumptive House Speaker ag Leyte 1st district Rep. Ferdinand Martin Romualdez, anang ginrekomenda ro “Bayan Bangon Muli (BBM)” package para mataw-an it special powers ro Pangueo sa tuyong mapanaba ro ginapangatubang nga mataas nga presyo it mga baeakeon sa nasyon.
Ro nasambit nga proposisyon hay magabuhay it 18 buean ag sa panyempo kara, magapatigayon it anti-hoarding powers si Pangueong Bongbong Marcos kamana man sa pagtao it insentibo sa produksyon ag pagtao it loans sa mga supplier it essential goods ag anti-price -gouging powers para mapunggan ro economic impact it nareport may kaangtanan sa presenteng mataas nga inflation rate.
Suno kay Salceda ro year-on-year inflation rate ukon kadasig it pagtaas it mga baeakeon hay sumaka eon sa 6.1% nga pinakamataas eon sigon umpisa ku nagtaliwan nga Nobiyembre 2018 kung siin maintok sigon ro indikasyon nga raya hay maganaba sa mga masunod nga buean.
Samtang, gusto man kara nga maka-angkon it motu propio powers ukon insigidas nga pag-aksyon apisar nga owa it formal request maghalin sa ibang partido para sa Department of Energy (DOE), Philippine Competition Commission (PhCC), ag Department of Trade and Industry (DTI) para imbestigahan ro posibleng market abuse sa energy ag essential goods sector.
