KALIBO, Aklan–Prayoridad makaron ni Makato Mayor Ramon Anselmo “Mon-mon” Legaspi ro pagpabaskog it healthcare system it banwa para makabulig sa mga pumueoyo.
Suno kay Mayor Legaspi nga nagapadayun makaron ro proseso para ibalik bilang municipal hospital ro presenteng birthing facility it banwa.
Tuyo sigon kara nga mapadali ro hospitalization it mga pumueoyo nga nagakinahang-ean it insigida nga pagbueong.
Sa oras nga maging operational eon ro pasilidad hay magiging bukas sigon raya para sa tanan.
Sambilog pa sa gustong tutukan it bag-ong alkalde ro pagpadayun ag pagpanami sa Makato Public Market.
Gusto sigon nana nga maayos ro daeagan it drainage system it tindahan para malikawan ro pagbaha kada naga-uean.
Ginpaathag man kara nga naayos eon nanda ro problema sa mga nakaparada nga truck sa atubang it munisipyo nga puno it basura.
Gusto sigon nana nga maayos ro solid waste management it banwa.
Pagatinguhaan sigon kara nga masolusyonan raya sa unang daywang dag-on it anang termino.
