Maskin nga nabawasan ro mga saeakyan sa karsada bangud sa non-stop oil price hike, makabig nga indi sa gihapon maduea ro grabeng traffic partikular sa metro manila.
Angot kara, ginmanduan eon it pamunuan it Department of the Interior and Local Government (DILG) ro mga local government units (LGUs) nga limpyuhan ro mga nagapangunang karsada ag mga alternatibong ruta sa andang natungdan nga nasakupan halin sa tanan nga mga sabeag sa daeagan it trapiko.
Ro problema, magapatigayon it clearing operation makaron, pagka-aga ukon pagtaliwan it pilang mga inadlaw , balik eon man ro mga pasaway nga gina-obra nga parking space ro karsada.
Ro daean nga para kunta sa motorista hay nagiging parking slot it mga baeay ag pati it mga business establishments.
Raya hay nagatuga it bottleneck sa mga major ag alternative roads, eabi eon sa Metro Manila.
Rason nga tiempo eon agud nga eubusan matuldukan ro makarondaya nga pagpang-abuso sa mga karsada nga para dapat sa motorista.
Kun kinahangean ro mas grabeng penalidad nga may mga masampulan , obrahon eon.
Dapat mas tutukan it mga LGUs ro nasambit nga problema ag papanaugan it penalidad ro mga matig-a it ueo.
