Nagataas ro numero it mga nakakaangkon it dengue.
Suno sa Department of Health (DOH), umpisa Enero 1 hasta Hunyo 25, 2022, nakalista eon it 64,797 nga kaso sa bilog nga nasyon.
90% nga mas mataas kaysa ko nagtaliwan nga dag-on sa kaparehong buean ag petsa.
Ro pagtaas it kaso it dengue ro rason kon ham-an nga ginaduso ni infectious disease expert Dr. Rontgene Solante ro paggamit it Dengvaxia vaccine.
Ro Dengvaxia sigon ro ginagamit sa Thailand, Malaysia, Indoneia ag Singapore para maproteksiyunan ro pumueuyu kontra sa dengue.
Tiempo eon sigon agud nga gamiton raya sa Pilipinas bangud sa pagtaas it dengue cases.
Dapat sigon nga rebyuhon ro data it Dengvaxia ag ro benepisyo kara.
Ro importante sigon hay ro tamang rekomendasyon ag pagdetermina sa indication kun hin-uno pagagamiton ro Dengvaxia.
Importante sigon kon anong edad ukon grupo igatau ro bakuna.
Ginklaru man ni Solante nga suspendido ro paggamit it Dengvaxia sa Pilipinas.
Ro pangutana hay kon pagasaligan pa it pumueuyu ro Dengvaxia.
May una pa ayhan nga mga ginikanan nga pasugtan ro andang mga unga nga maturukan it Dengvaxia?
Mabahoe ro kontrobersiya nga gintuga it nasambit nga bakuna ko Abril 2016 matapos nga maturukan ro masobra sa 700 nga mga estudyante sa National Capital Region (NCR), Calabarzon ag Central Luzon.
Suno sa mga eksperto, maabu nga unga ro nakaangkon it kumplikasyon ag may namatay matapos nga bakunahan.
Insigidang ginpapundo it gobyerno ni President Noynoy Aquino ro vaccination ag nakaangkon it imbestigasyon.
Ko 2017, ginpahayag it Sanofi Pasteur, manufacturer it Dengvaxia, nga ro dapat mabakunahan eamang hay ro mga nagka-dengue eon.
Makaangkon sigon it kumplikasyon kon nabakunahan ro sangka owa pa nagka-dengue.
Ro makangawa-ngawa hay kon ham-an nga owa eagi raya ginpahisayod it manufacturer it Dengvaxia antes nga ginpatigayon ro vaccination program ag ginpasugtan man it mga pinuno it Department of Health (DOH) kato.
Suno sa report, ginpapila ro mga unga ag dayun nga ginturukan nga owa nakaangkon it interbyu.
Owa man sigon nasayuran it mga ginikanan it mga unga ro gin-obra nga pagbakuna.
Maabu ro naduea-an it pagsalig sa bakuna bangud sa kontrobersiya it Dengvaxia.
Pati pagpabakuna kontra sa COVID, ginkahadlukan.
Makaron hay gustong ibalik ro Dengvaxia.
Mag-usoy eon lang it ibang bakuna ag bukon it dengvaxia.
