Umabot sa kapin 1.9 billion ro haega it Social Amelioration Program (SAP) subsidy ro napaseawan nga igapanupod it Department of Social Welfare and Development (DSWD) para sa mga benepisaryo it nasambit nga ayuda sandig sa latest report maghalin sa Commission on Audit (COA).
Sa 2021 annual audit report it COA sa DSWD, nakabaehag nga ro gintaeana nga Cash Advances (CAs) sa Special Disbursing Officers (SDOs)/Accountable Officers (AOs) it DSWD Field Office sa National Capital Region ag Region 6 ukon Western Visayas para sa implementasyon it SAP nga nagakahaega it kapin sa P1,908,536,000 ro owa sigon hapanupod sa mga benepisaryo nga owa nakabaton it nagakaigo nga financial assistance sa pagpaeanasa it pandemiya.
Suno sa COA, ro haeaga it cash advances nga ginrefund it Special Disbursing Officers ag Accountable Officers maghalin sa field office sa NCR hay mas mataas pa kumpara sa naipanupod nga cash aid sa SAP beneficiaries.
Sandig sa report it COA, nakabaehag nga ro refunds hay bangud sa mahina sigon nga pagplano ag monitoring sa parte it mga nag-implementa it nasambit nga programa bangud kapin sa 15% hasta 30% eamang ro payment turnout kumpara sa refunds maghalin sa kabilugang igintaeana nga cash advances.
Sa pihak nga parte, gin-rekomenda it COA sa DSWD nga manduan it ahensiya ro andang regional directors ag program implementers nga maghathat it konkreto nga plano sa pagpanupod it cash advances sa mga Special Disbursing Officers ag Accountable Officers para eubusan nga masabat ro mga kinahangeanon sa nasambit nga programa.
Samtang, may kabilugan nga kapin sa P2.552 billion sa cash advances nga ginpanupod it DSWD sa mga SDOs ag AOs angot sa pagpanupod sa SAP ro nagapabilin nga unliquidated.
