Naging tourist attraction makaron ro sementeryo it Misantla Mexico, bukon it bangud nga may celebrity nga naka-eubong idtu kundi bangud sa rebulto nga korteng kinatawo it eaeaki nga ginpatindog sa panchon it sangka 99-anyos nga lola!
Pilang dag-on antes nga namatay, ginahambae eon ni Catarina Orduna Perez ukon “Doña Cata” sa anang pamilya ag mga amigo nga gusto nana nga may rebulto it kinatawo it eaeaki sa anang magiging panchon.
Ro pageaum it tanan, bukon it seryoso ro magueang ag naga-joke eamang raya.
Apang pilang adlaw antes nga namatay si Doña Cata ko Enero 20, 2021, gin-uman kara ro kakaibang hinyu nga butangan it rebulto nga korte it kinatawo it eaeaki ro anang eubnganan.
Nakaangkon it mabahoe nga diskusyon ro bilog nga pamilya ni Doña Cata bangud nga nasyauran nanda nga pwedeng magtuga it eskandalo ro rebulto.
Inabot man it pilang buean ro pagdesisyon it pamilya, nag-abot sanda sa konklusyon nga sundon eon lang ro ulihing bilin it magueang.
Ko Hulyo 28, 2022, ginpatindog ro masobra sa limang tapak nga rebultong korte it kinatawo it eaeaki sa eubnganan ni Doña Cata.
May bug-at nga 600 pounds ro rebulto.
Suno sa apo it magueang nga si Alvaro Mota Limon, kilaea sa andang banwa ro anang lola bilang mabuot, open minded ag bukon it mapanghusga sa isigkatawo.
Dugang pa kara nga maskin nga agaw pansin ro rebulto, ginsunod nanda ro ulihing hinyu ni Doña Cata bangud nga gusto kara nga maskin owa eon imaw sa ibabaw it kalibutan hay matandaan imaw it mga tawo it andang banwa sa Misantla.
