Ginlunsar sa probinsya it Aklan sa pagpanguna it provincial government, Provincial Health Office ag Aklan Medical Society ro PinasLakas, sangka programa it Department of Health ukon DOH nga ro katuyuan hay mapasanyog ro booster shot vaccination kontra sa covid-19.
Suno kay Aklan Governor Joen Miraflores, determinado si Pangueong Ferdinand Marcos Jr. nga mapabaskog ro bakunahan sa nasyon agud nga makabalik sa normal nga pagpangabuhi ro tanan sa pihak nga una gihapon ro paeag it pandemya.
Ginpahayag dugang nga engkasong maangkon ro 50 porsyento nga bakunahan it booster shot hay may tyansa sigon ro lokal nga gobyerno nga dueaon sa lugar ro mandatory nga pagsuksok it facemask.
Apang, himuon sigon raya bukon eamang it para maproteksyunan ro komunidad kundi ro kaugalingon nga pamilya.
Samtang sa pihak nga parte, ginpaathag ni Dr. Allan Tolentino, vice president it Aklan Medical Society, nga kon nakapaturok it booster shot hay mabahoe ro tyansa nga makasurvive sa maskin ano nga sub variant it virus engkaso nga matamaan kara.
Uwa pa suno kana natapos ro pandemya rason nga ro tanan hay dapat nga magtingob pinaagi sa pagta-o it andang oras nga mag-adto sa mga vaccination area ag magapturok eon it booster shot.
Sa raya nga pamaagi sigon hay makabulig sa nasyon nga inde eon maeogmok it uman bangud sa pandemya.
Ro nasambit nga programa hay ginpasakupan it nagkaeain-eain nga sektor kaparehas it vendors, estudyante, manugturo ag maabong iba pa.