Eagpas sa P100 per kilogram level eon ro retail prices it produktong asukal sa nasyon rason nga ginaduso sa makaron it Sugar Regulatory Administration (SRA) ro dugang nga pag-angkat pa it asukal.
Suno kay SRA Administrator Hermenegildo Serafica, ginatan-aw sa makaron it ahensiya ro pag-angkat it 300,000 metric tons it asukal sa tunga it pagnaba it stockpile nga asukal sa nasyon.
Ginaeauman nga maganaba ro mataas nga presyo it asukal kung pagataasan ro local supply pamaagi sa pag-angkat.
Una eon nga ginpahayag it SRA official nga ginagamit eon ro buffer stock nga may una ro nasyon kung siin planong irekomenda it taeatapan it SRA ro sangka sugar order sa board sa masunod nga dominggo sakop kara ro tanan maghalin sa industrial kaeakip ro retail.
