KALIBO, Aklan—Dapat nga seryosohon ro sakit nga pneumonia.
Raya hay bangud nga nagapangaywa raya sa mga rason it pagka-ospital ag pagkamatay it maabu nga mga pumuoeyo kada dag-on.
Suno kay Dr. Glenford Refre, Internist-Pulmonologist ag presidente it Aklan Medical Society nga ro pneumonia ukon pulmonya hay sangka acute respiratory infection sa baga nga tuga it bacteria, fungi, parasites ag virus nga posibleng magtuga it pag-angkon it tubi sa baga.
Raya hay pag-angkon it inflammation sa air sac it sambilog ukon parehong baga it sangka indibidwal.
Posibleng makaangkon ro sinuman it nasambit nga sakit apang mas madali kara nga kapyutan ro mga tawong may mahina nga resistensya kapareho it mga unga, magueang ag immonucompromised.
Pwedeng mabueong ag malikawan ro pneumonia apang mabudlay raya nga buengon kung indi eagi maagapan.
Pila sa mga sintomas it sakit hay ro pagpaeanakit it eawas, pagpaeanuka, pagkahilo, diarrhea ag pagdasig it pagginhawa.
Ro pneumonia hay masami nga nabubuoe sa pag-inhale it virus ag bacteria halin sa pag-ubo ukon pagbahaon it ibang tawo nga may angkon kara.
Ro paghugas it alima ag pagkaon it masustansyang pagkaon ro nagakadapat para magbaskog ro resistensya ag masuk-ean ro nasambit nga baeatian.
