Naging headline it mga diyaryo ag news program sa Thailand ro sangka 60-anyos nga eaeaki kat ginhungod kara nga madakpan matapos nga magpanakaw sa sangka baealigyaan bangud nga mas gusto nana nga mag-istar sa presuhan.
Natabu ro insidente ko Hulyo 29, 2022 sa sangka pharmacy nga makit-an sa Chonburi province.
Ginhungod it 60-anyos nga si Phichit nga madakpan imaw it staff it pharmacy nga nagpanakaw it tatlong bilog nga sabon nga nagabalor it 17 Baht.
Bangud nga senior citizen eon si Phichit, ginkaeu-uyan ag ginpatawad imaw it manager it pharmacy.
May iba pang mga customer nga nagpakita it mayad nga kabubut-on ag gintanyagan ro senior citizen nga sanda eon lang ro magabayad it gintakaw kara nga sabon.
Apang nakibot ro tanan kat nagpilit ro magueang nga isugid imaw sa pulis.
Ginsunod it mga taga pharmacy ro kagustuhan ni Phichit ag gin report imaw sa pulis.
Pagkadaea sa presinto, gin-aku ni Phichit nga dati eon imaw nga ex-convict ag mas sanay imaw sa kabuhi sa presuhan.
Sa karsada eamang naga-istar si Phichit ag mas gusto nana nga sa presuhan bangud nga tatlong beses imaw nga nagakaon idtu.
Sa makaron, bukon it klaru kun ano ro madangatan ni Phichit ag kun ano ro naging desisyon it mga pulis nga nagdakop kana.
