Dapat nga kastiguhon ni President Ferdinand Marcos Jr. ro Sugar Regulatory Administration (SRA).
Ukon kon may delikadesa ro mga eakot nga SRA officials sa importasyon it asukar, dapat sandang mag-resign sa puwesto.
Nag-umpisa ro kontrobersiya kat pirmahan ni Department of Agriculture Undersecretary Leocadio Sebastian ro Sugar Order No. 4 nga naga-import it 300,000 metrikong tonelada it asukar sa pihak nga owa it pahanugot ni Pres. Ferdinand Marcos, nga presenteng Agriculture secretary.
Kaibahan man sa mga nagpirma sanday SRA administrator and vice chairman Herminigildo Serafica ag SRA members Roland Beltran ag Gerardo Valderrama Jr.
Nag-resign eon si Sebastian ko Biyernes.
Ko nagtaliwan nga Hulyo 29, 2022, nakaangkon it konsultasyon ro SRA sa sugar planters, millers, refiners ag traders angot sa pagahimuon nga importasyon it asukar ag iba pang detalye sa import program.
Ginpahayag ni Serafica nga owa it ibang pamaagi kundi ro mag-import it asukar para masolbar ro problema sa kakueangan it asukar.
Apang ro planong pag-import hay gin-reject ni President Marcos.
Owa it gintau nga rason ro presidente kun ham-an nga gin-reject ro planong importasyon.
Apang nagatuhaw nga naga-oponer gid man ro presidente sa importasyon bukon eamang sa asukar kundi sa iba pang agri products.
Ko Hulyo, matapos ro anang inagurasyon ag ginbuytan ro obligasyon bilang Agriculture secretary, nagapamaeabag eon ro presidente sa importasyon.
Owa imaw naila nga mag-import bangud nga gusto nana nga mapa-abu ro pagkaon.
Makangawa-ngawa man ro aksiyon it mga nagpirma sa Sugar Order No. 4.
Ham-an nga masyado nandang gustong mag-import ag owa ginpahisayod ro presidente angot kara.
Gin-obra man ro plano nga pag-import sa tiempo it pag-ani it tubo ukon sugarcane.
Ano ro nagakatabu sa mga pinuno it SRA nga maabu nga gina-harvest nga tubo apang gusto pang mag-import?
Gusto baea nanda nga mamatay ro industriya it asukar sa nasyon?
Paalin nga makabawi ro mga lokal sugarcane farmers kun magabuhos ro asukar sa merkado.
Kun may nabilin pang delikadesa ro mga eakot nga SRA officials, dapat aywan eon nanda ro puwesto
