KALIBO, Aklan–Pagapadayunon eon it contractor nga International Builders Construction ukon IBC ro ginahimo nga asphalt overlay sa mga karsadahon nga sakop it Brgy. Libas, Tabayon ag Venturanza, Banga.
Suno kay Engr. Joey Ureta, maintenance head it Department of Public Works and Highways ukon DPWH Aklan nga raya hay matapos nga nakumpleto eon it contractor ro andang mga kueang nga kagamitan agud nga mabalikan it uman ro andang temporaryong inaywanan nga trabaho.
Madumduman nga waea-tuo ro batikos it mga motorista ag residente sa lugar bangud nga sambilog raya sa mga rason it aksidente sa daeanon.
Mag-eowas kara, ginareklamo dugang ro kakueangan it contractors sa mga warning devices ag informative signages sa tanan nga road under construction para sa kaeowasan it mga motorista ag travelling public.
Ginpahayag dugang ni Engr. Ureta nga hugot ro andang monitoring sa tanan nga proyekto it nasambit nga contractor kon siin ginaeauman nga makaron nga adlaw hay maresume eon ro andang trabaho bangud nga bukon pa it eksakto ro surface sa pag-aspalto nga ginatunaan it aksidente it pilang ka mga motorista.
