Kapin sa 20.6 milyong doses it bakuna kontra sa COVID-19 ro nag-expire ko Hulyo 31, 2022, suno sa Department of Health.
Ag may una pa nga maga-expire sa Agosto 31.
Ro mga nauyang nga COVID vaccine hay ginaeakipan it Moderna at Astrazeneca.
Owa man namitlang kon ano kaabu ag anong mga brand it vaccine ro maga-expire sa katapusan it Agosto.
Suno kay Department of Health (DOH) officer-in-charge Maria Rosario Vergeire, 8.42 porsiyento it bakuna ro nauyang.
Ko Hunyo, may una man nga nauyang nga bakuna nga umabot man sa 4.7 porsiyento.
Kaabuan sa nauyag nga mga bakuna hay ginbakae it private companies.
Suno pa kay Vergeire, nagpromisa sigon ro World Health Organization COVAX Facility nga pagabayluhan ro nag-expire nga mga bakuna.
Maga-abot sigon ro mga kabaylo nga bakuna sa Disyembre makaron nga dag-on.
Mayad man ag gin aku it DOH ro mga nauyang nga COVID vaccine.
Kabay nga indi eon mauman ro pagka-uyang it mga maga-abot pa nga bakuna bangud nga makahueuya man sa COVAX facility nga ginaprayoridad nanda ro pagpadaea it bakuna ag mauyang eamang.
Maabu ro nagakinahangean it bakuna sa kalibutan eabi eon ro mga pigado sa Africa nga kaabuan hay haeos nga owa pa nabakunahan.
Owa kunta nauyang ro mga bakuna kon naging madasig ro DOH sa pagbakuna sa pumueuyu.
Nakipag-angot eagi kunta sa LGUs ro DOH agud nga ginpatigayon ro bakunahan.
Ginhambae man ni Go Negosyo founder Joey Concepcion nga mahinay ro DOH sa pagbakuna rason nga maabu ro nauyang nga vaccine.
Suno kay Concepcion, maabu ro willing magpabakuna apang ro DOH ro may problema.
Mabahoe nga kantidad ro nauyang sa mga nag-expired nga bakuna.
Nagka-utang it mabahoe ro Pilipinas bangud sa pagbakae it mga bakuna ag ko ulihi hay mabasura eamang gali.
Kabay nga indi eon mauman ro pagkasamad it mga bakuna.
