Nakibot ro mga pulis nga rumesponde sa sangka 911 call halin sa sangka zoo sa California kat masayuran nanda nga ro nagtawag sa emergency hotline hay sangka capuchin monkey!
Suno sa San Luis Obispo County Sheriff’s Office, nakabaton ro 911 dispatchers it tawag halin sa sangka zoo.
Madasig nga na-disconnect ro tawag ag owa eon nagasabat kat ginhana nanda nga tawagan raya pabalik.
Nagresponde sanda sa source it tawag, ro wildlife sanctuary nga Zoo to You sa Paso Robles, California.
Pag-abot nanda sa lugar, owa it maskin sambilog sa mga nagatrabaho idtu ro naghambae nga nagtawag sanda sa 911.
Nagbueuligan ro mga awtoridad ag staff it zoo agud nga imbestigahan kun siin naghalin ro 911 call ag natukiban nanda nga ro capuchin monkey nga si Route ro may kahimuan it pagtawag.
Sa imbestigasyon it sheriff’s office, nabo-oe ni Route ro cell phone it sangka staff nga naywan sa golf cart ag napindot kara ro emergency call function.
Suno sa mga tagapag-alaga it mga capuchin monkey sa zoo, curious ag mausisa ro mga nasambit nga amo ag mahilig sandang magpindot kon may buton ro mga bagay nga andang ginabuytan.
