Amat-amat eon nga nagnaba ro presyo it asukar sa merkado publiko.
Raya hay matapos ro amat-amat nga pagbalik it bastanteng suplay maghalin sa pilang rehiyon sa nasyon.
Suno kay Betty Robelo, manugbaligya it asukar sa Kalibo public market nga kapin sa 50 pesos kada sako it asukar ro gin-naba sa andang nagtaliwan nga delivery.
Apang sangkiri eamang anay ro ginboue nanda nga suplay bangud engkaso nga padayon nga magnaba pa gid sa masunod nga mga inadlaw ro presyo it asukar hay basi sanda man sigon ro malugi.
Epektibo eon sigon makaron nga adlaw ro pagpatuman nanda it pagpanaba it presyo it asukar kung siin ro dating 96 pesos kada kilo it refined sugar hay puwedi eon sa 95 pesos ag ro brown sugar nga dating 72-74 pesos hay maganaba sa 70 pesos kada kilo.
Nagaeaum ro mga negosyante sa merkado publiko nga magapadayon eon ro pag-stable it suplay sa asukar para man magnaba eon ro presyo kara.
Apang, dugang pa ni Robelo nga ro pag-angkon it bastante nga suplay it asukar hay may posibilidad man sa gihapon it pagtaas ukon pagnaba it presyo kara.
Bangud may mga pilang negosyante nga kung makatunog sa pagbastante it suplay hay ro gilayon nga paghoard ukon tago it suplay it asukar sa andang mga pribadong bodega rason it shortage ag pagtaas it presyo kara sa mga merkado
