KALIBO, Aklan–Nagapati ro Kabataan partylist nga bukon pa it tyempo nga i-abolish ro ahensya it Presidential Commission on Good Government ukon PCGG.
Raya hay kasunod sa ginpabutyag it bag-ong administrasyon ni Pangueong Ferdinand Marcos Jr. nga dueaon eon ukon i-abolish ro mga ahensya it gobyerno nga uwa it function.
Ginpanindugan ni Kabataan partylist Raoul Danniel Abellar Manuel nga may mabahoe pang papel ro PCGG nga dapat gampanan ag raya hay ro pagpadayon sa pag-eagas sa manggad it mga Marcoses nga ginapatihan nga tinakaw sa kaban it bayan maghalin pa nga naging presidente ro ama ni Marcos Jr. nga si dating president Ferdinand Marcos Sr.
Ginpahayag dugang nga maabo ro nagaduso sa kongreso nga i-abolish eon ro nasambit nga ahensya it gobyerno apang sa andang parte hay uwa pa raya nagakabagay ag inde dapat maimpluwensya it presenteng presidente bangud nga pamilya nana ro ginaeagas.
Ro masubo eamang sigon kara kon gamiton it presidente ro anang poder para eamang maabolish ro ahensya pinaagi sa igapaguwa nga executive order.
Raya suno kana ro dapat nga bantayan sa makaron bangud nga mabahoe ro responsibilidad ag obligasyon it nasambit nga ahensya ag inde pa dapat nga i-abolish.
