Ginpangunahan ni Vice President ag Department of Education (DepEd) secretary Sara Duterte ro pagbukas it klase ko Lunes.
Suno kay Sara, ro pagbukas it klase sa tiempo it pandemya hay mabug-at nga tikang.
Mabudlay nga desisyon ro pagbukas apang gin-obra aeang-aeang sa puturo it mga unga.
Makaron nga nag-umpisa eon ro face-to-face classes, nagaeaum nga ro mga naduea nga gap sa pagtinueun-an bangud sa pagpanaeasa it pandemya hay maibalik eon.
Pagkatapos it masobra sa daywang dag-on nga owa it face-to-face classes, maabu nga naduea sa mga estudyante.
Maabu ro naghambae nga ro online learning hay owa it gintuga sa andang mga unga.
Owa it natun-an sa sueod it daywang dag-on.
Suno sa mga ginikanan, medyu naghampang eamamg sa atubang it computer ag gadgets ro mga unga sa tiempo it blended learning.
Sa sangka pagtuon, maabung unga nga naga-edad it waeo ro indi maka-intigo nga magsueat ag magbasa.
Rason nga ro hambae it mga ginikanan nga mas epektibo ro face-to-face classes kaysa online learning.
Ro sambilog sa problema nga owa nasolbar it DepEd sa pagbukas it klase ko Lunes hay ro kakueangan it classrooms.
Luma eon raya nga problema apang hasta sa makaron hay owa pa nasolbar.
Mag-eowas sa kakueangan it classroom, kueang man ro mga bangko rason nga may mga estudyanteng nagapungko sa saeog ukon maeamig nga semento.
Solbaron ro kakueangan sa classroom.
I-eakip man ro kakueangan sa malimpyo nga comfort room, may bastante nga tubi ag sabon nga importante makaron nga may pandemya.
Kabay nga raya hay masolusyunan eabi pa ag mabahoe man ro budget it DepEd.
