KALIBO, Aklan—Nagpanupod ro Bureau of Fisheries and Aquatic Resources ukon BFAR it fuel subsidy discount card sa 476 nga mangingisda sa Aklan.
Suno kay Meagan Bernadette Magno, Admin Technical Staff it BFAR-Aklan nga nagbaton ro kada benepisyaryo it tig-3,000 pesos nga kantidad it ayuda sa idaeum it programang Fuel Discount for Farmers and Fisherfolks it Department of Agriculture.
Sa nasambit nga numero, 139 ro naghalin sa Numancia, 91 ro naghalin sa Makato, 181 sa batan ag 65 sa Altavas.
Pila sa mga nag-apply hay na-disqualify matapos nga owa nakompleto ro mga dokumento samtang ro iba hay nakabaton eon it ayuda halin sa DA.
Ro Fuel Discount Program hay para sa mga mangingisdang may rehistradong baroto sa idaeum it FishR program it DA.
Samtang, gindugang pa ni Magno nga may nakataeana eon sanda nga listahan it mga dugang nga benepisyaryo nga magabaton it kaparehong ayuda para sa second tranche.
Tuyo kara nga mapahagan-hagan ro epekto it pagtaas it presyo it mga produktong petrolyo sa lokal nga industriya it pagpangisda.
Kadungan kara, gin engganyo it BFAR ro tanan nga mga mangingisda sa Aklan nga may baroto nga maskin owa it makina hay magpa-rehistro agud nga madali sanda nga mausoy engkaso nga may igatau nga subsidiya ro gobyerno.
