Ginpasara eon it Department of Social Welfare and Development (DSWD) ro andang online application para sa educational assistance program para sa mga indigent students sa nasyon.
Raya hay matapos nga magbuhos pa ro numero it mga indibidwal nga gustong makabaton it ayusa maghalin sa nasambit nga programa.
Ginpaathag ni DSWD spokesperson Romel Lopez nga raya hay bangud sa indi eon masarangan it andang sistema nga igapadayon pa ro nasambit nga programa bangud sa kaabuon eon man it mga aplikante.
Sa makaron sigon hay masobra sa daywang milyong registrants eon ro andang nalista para sa payout it nasambit nga programa ag masobra sa katunga eon sigon sa andang Php1.5 bilyon nga budget sa programa ro nagamit eon.
Apang ginklaro man ni Lopez nga owa it dapat nga kabaeak-an ro mga indibidwal nga una eon nga nakapa-rehistro bangud magapadayon sa gihapon ro andang proseso para sa mga raya.
Sigidas eon man sigon ro pag-ayos ag finalize it mga natungdan sa mechanics angot sa pagpondo para sa educational program it DSWD para mas maabo pang mga Pilipino ro andang mabuligan ukon maabot it nasambit nga ayuda.
Madumduman nga una eon nga ginpahayag it tagapaghambae nga sa Setyembre 24, 2022 ro nakataeana nga pagtapos it pagpanupod it nasambit nga ayuda para sa mga pobre nga estudyante nga kung siin malabo eon sigon nga mapaeawig pa bangud sa iba pang obligasyon nga pagatutukan man it ahensya ag para man sa iba pang bulig nga posible nandang mapaabot sa iba pang mga benepisyaryo.
Sa makaron, masobra 290,000 eon nga mga estudyante ro nakabaton it bulig maghalin sa educational assistance program it DSWD.
