Ro eskwelahan ro ginakabig nga ikaywang baeay rason nga sigurado ro mga ginikanan nga eowas sanda sa mga manugturo nga nagatindog man nga ginikanan.
Hasta nga may mga insidente it pagpang-abuso.
Bukon eamang sa pagpanghambae kundi maging sa pisikal ag sekswal.
Kan-o eamang kat may napabalita nga pilang titser nga eakot sa sexual abuse.
May naga-offer sa mga estudyante nga maging karelasyon, mag-obra it kabastusan ag iba pang saea nga hilimuon.
Pinaagi sa social media, nakaangkon it boses ro mga estudyante nga mabulgar ro pagpang-abuso.
Ginpasiguro man it mga awtoridad ro ‘Zero-tolerance’ policy sa anumang klase it pagpang-abuso.
Kinahangean nga mapanabat ro mga eakot sa anumang klase it pagpang-abuso sa mga estudyante.
Bukon eamang agud nga matur-an sanda it leksyon kundi agud nga magsirbi raya nga paandam sa mga nagaplano nga mag-obra it maeain.
Masyadong mataas ro tan-aw ag pagdayaw sa atong mga manugturo
Kabay nga indi paghigkuan it pila nga owa it konsensiya.
Ro mga abusadong manugturo hay owa it lugar sa eskwelahan, bukon kamo it angay ag bagay nga maka-ibahan eabi eon nga tuearon it pamatan-on.
Indi paghigkuan it kabastusan ro eskwelahan nga nagahubog sa kaisipan it mga unga.
Sa aton man nga mga estudyante, maging madahan ag indi mahadlok nga magsugid kon may kakaiba kita nga nabatyagan eabi eon kon kita hay gina-abuso sa anumang pamaagi.
