Magapatigayon it kauna-unahang job fair matapos ro haeos daywang dag-on nga pandemya ro Aklan Provincial Government pinaagi sa Provincial Public Employment Service Office ukon PESO ag Aklan Tourism and Trade Investment Promotions Center ukon ATTIPC sa pakikipagbueoligan man it Department of Labor and Employment ukon DOLE Aklan Field Office.
Suno kay Sharon Mae Julian, tagapaghambae it PESO Aklan nga raya hay daywang adlaw nga aktibidad nga pagahiwaton sa Setyembre 15 hasta it 16 sa idaeom it programang Aklan Career Expo ukon ACE nga may titueong “Trabaho, Negosyo, Kabuhayan” sa ABL Sports and Cultural Complex, Capitol Site, Estancia, Kalibo.
Ginpahayag dugang ni Julian nga kapin sa 19 ka mga establisyimento para sa local employment ro nagkumpirma ag magata-o raya it masobra sa sang libong trabaho sa mga Aklanon.
Samtang, linibo man ka mga trabaho ro daea it mga recruitment agency halin sa syudad it Iloilo ag Metro Manila para sa overseas employment.
Tuyo kara nga mapataas ro economic status it mga pumueoyo ag makata-o it possible future investment ag trade opportunities.
