Kato kung ginahambae nga sa private hospital nagatrabaho ro nurse, ginakahikawan.
Raya hay bangud nga pribado ag ro dating sa tawo hay bigatin.
Mabahoe nga ospital rason ga maabu nga pasyente, kumpleto sa gamit ag kung anu-ano pa.
Rason nga maabu nga nurses kato ro gustong makasueod sa mga pribadong ospital para sikat.
Apang, sa kamatuoran bukon gali it suwerte ro makasueod sa pribadong ospital bangud sa sangkiri nga suweldong ginabaton ag tambak pa ro trabaho.
Mag-euwas kara, owa pa ginatao ro andang mga natungdan nga benipisyo.
Overworked apang underpaid ro mga nurses sa pribadong hospital.
Suno sa report, maabu nga nurses sa private hospitals ro naga-sweldo eamang it P9,000.
Ag ro masaklap pa owa ginabayaran ro andang overtime.
Atrasado man ro mga benefits maskin nga naisa-laye eon ro pagtao kara sa tanan nga healthcare workers.
Ro kahimtangan it nurses sa private hospital hay mabatyagan makaron nga may pandemya.Makaeu-euoy ro andang sitwasyon nga medyo nakalipatan eon.
Nagakadapat eon nga magpasilabot ro Department of Labor and Employment (DOLE) para masolusyonan ro problema.
Kung indi paga-aksyunan it DOLE ro kahimtangan it nurses, posibleng maubos ro mga nagatrabaho sa pribadong hospital.//Pakialaman eon it DOLE ro problema antes pa maging ulihi ro tanan.
