Ginakasubo it grupong Bagong Alyansang Makabayan ukon Bayan Aklan nga kapin sa 155 ka mga benepisyaryo it educational assistance eamang ro mataw-an it Department of Social Welfare and Development ukon DSWD sa pay-out nga pagahimuon makaron nga adlaw it Sabado.
Suno kay Mr. Kim Sin Tugna, provincial coordinator it nasambit nga grupo nga sa pihak nga ginarecognize nanda ro tikang it ahensya nga direktang ginata-o sa mga nagakinahang-ean nga estudyante ro ayuda hay palpak sa gihapon ro sistemang ginpatuman.
Raya hay bangud nga bukon it tanan nga una idaeom it urban poor hay mga smartphone ag email nga sarang makaparehistro sa online nga ginkriar it ahensya para sa mga kwalipikadong kliyente.
Raya man suno kana ro rason kon ham-an it maabo sa gihapon ro nagapasimpalad nga mataw-an it igtaeopangod bangud nga sangkiri nga porsyento eamang kon tan-awon ro mga kubos nga estudyante nga naka-avail sa nasambit nga programa it ahensya.
Mag-eowas kara, kueang pa suno kana ro pondo nga gin-alokar ag inde makaakomodar sa mabahoe nga porsyento it enrolles makaron nga school year.
