KALIBO, Aklan–Nag-umpisa eon ro konstruksyon it 2-storey building nga Community Based Rehabilitation Center ukon “Baeay Pagbag-o it Kalibo” nga nahamtang sa Brgy. Nalook, Kalibo.
Suno kay Sangguniang Bayan member Philip Yerro-Kimpo nga ginakalipay nana ro pag-apruba it Dangerous Drugs Board sa andang request nga makaangkon it pondo sa pagpatindog it nasambit nga pasilidad.
Matapos sigon nana nga masayuran nga may available nga grant ro taeatapan para sa mga lokal nga gobyerno hay insigida sanda nga naghimo it resolution.
Sambilog sigon ro banwa it Kalibo sa mga nataw-an it P5 million nga pondo para sa pagtukod it rehabilitation center.
Ro pasilidad hay para sa drug rehabilitation kamana man nga pwedeng gamiton sa iba pang katuyuan kapareho it pag-rehab sa mga alcoholic ag livelihood and skills training para makabulig sa mga pumueoyo.
Ginpahayag dugang nga ginahueat eon lang nanda ro magiging sabat it taeatapan sa andang panibag-ong ginpaabot nga request.
