KALIBO, Aklan–Sigidas ro ginahimo nga paglibot ni Kalibo Sangguniang Bayan member Augusto Tolentino sa mga kabarangayan para magpatigayun it hinun-anon sa mga senior citizen.
Suno kay Tolentino, maabu gihapon nga mga katigueangan ro owa nakasayod sa andang mga prebilihiyo eabi eon sa pag-angkon it diskwento sa pagbakae it bueong ag iba pang kinahang-eanon sa mga establisyemento.
Pila pa sa mga ginpaathag it opisyal hay ro anang ginpasa nga ordinansa ko 2020 angot sa P4,000 nga medical assistance ag P5,000 death benefit para sa mga senior citizen sa banwa it Kalibo.
Ro kwalipikado sigon sa raya nga benepisyo hay ro mga senior citizen nga owa it SSS ag GSIS.
Samtang, ginklaro man kara nga nagapabilin gihapon nga P500 ro mabaton nga social pension it mga senior apisar nga aprubado eon ro pagpataas sa sang libo it andang bueanan nga pension.
Raya hay bangud owa pa it pondo nga gintaeana para kara sa 2023.
Angot kara, plano sigon it kongreso ag senado nga magpasa it additional appropriations para maitao ro nasambit nga kantidad.
