KALIBO, Aklan–Ginkumpirma it Social Security System (SSS) nga may ginatanyag sanda nga ‘condonation’ para sa mga miyembro nga nakaangkon it kapin sa tatlong buean nga loan delinquency.
Suno kay Rene Moises Gonzales, Branch Manager it SSS-Kalibo nga pwedeng mag-apply kara ro mga miyembro nga nakaangkon it haeos tatlong buean nga lapse sa pagbayad.
Tuyo sigon it programa nga bue-on ro penalty sa kada buean nga mapas-eawan nga makabayad ro sangka miyembro nga nag-avail it loan.
Nasayuran nga may 1 percent nga penalty sa kada buean nga indi mabayaran.
Ko kan-o eamang hay nagpatigayun it diskurso si Pangueong Ferdinand “Bongbong” Marcos Jr. kadungan it 65th Anniversary it SSS kung siin gintaw-an kara it punto ro ginahimo nga tikang it anang adminitrasyon para buligan ro mga pigado nga sektor para maging maugan ro paghueog sa SSS.
Nagapati ro Pangueo nga mabahoe nga bulig man ro ‘contribution penalty condonation program’ it taeatapan sa mga business ag household employers eabi eon makaron nga may krisis tuga it COVID-19 pandemic.
