Ginklaro makaron it Department of Trade and Industry ukon DTI nga bukon it makabig nga basic necessities ukon prime commodities ro softdrinks rason nga uwa raya sa listahan it andang mga ginamonitor pag-abot sa presyo kamana man uwa raya it suggested retail price ukon SRP.
Ginpaathag ni Ma. Carmen Ituralde, provincial director it DTI Aklan nga may kanya-kanyang ahensya nga nagamonitor sa mga nagapangunang baeak-eon ag kinahang-eanon it publiko adlaw-adlaw.
Mismong mga nagapangunang baeak-eon kaparehas it groceries nga ginakaeakipan it kape, gatas, asukar, sardinas, noodles ag iba pa ro ginamonitor it DTI sandig sa ginapaguwa nga SRP.
Mataeopangdan nga nagtaas makaron ro presyo it sikat nga mga brand it softdrinks bangud sa ginaturo nga kakueangan sa suplay it asukar.
Apang, may kinamatarong suno kay Ituralde ro mga consumers nga pumili ag magcanvass it mas barato sa masarangan nanda nga presyo.
Samtang sa pihak nga parte, uwa pa suno kay Ituralde it ginpaguwa nga SRP sa mga produkto nga pang noche buena.
Sa oras sigon nga magguwa raya hay gilayon nanda nga isapubliko ag imonitor ro mga baealigyan para masiguro nga uwa it negosyante nga makapamentaha sa nagahilapit nga selebrasyon it Paskwa ag Bag-ong Dag-on.
Nauna eon nga nagpaandam ro ahensya nga posibleng may pagtaas sa mga produktong pang noche buena rason nga ginalaygayan ro pumueoyo nga may mga budget eon nga magpamakae it temprano.
