Ginlunsar it Philippine National Police ro Revitalized KASIMBAYANAN Program nga tuyong pabaskugon ro pagbueoligan sa tunga it PNP ag simbahan agud eubos nga maserbisyuhan ag maobligahan ro responsibilidad nga amligan ro komunidad.
Suno kay P/Cpl. Leonelyn Artes it Aklan Police Provincial Office, ro KASIMBAYANAN hay nagatumod sa mga katagang Kapulisan, Simbahan, ag Pamayanan kon siin ginataw-an kara it importansya ro pagbueoligan ag pakikipagbuylog it kada isaea para sa kadaeag-an nga maipatuman ro mga laye ag programa para sa kamaeayran ag kapakanan it kaabuan.
Ginpahayag dugang nga ginakilaea sigon it PNP ro simbahan bilang kabulig sa pagtaguyod it kaayusan ag kalinungan sa sosyodad.
Mag-eowas kara, tuyo pa it nasambit nga programa nga pasanyugon ag suportahan ro presenteng PNP peace and security framework nga M+K+K=K ukon ro Malasakit, Kaayusan, Kapayapaan paadto sa Kaunlaran.
Naging guest speaker sa programa it Aklan PPO si Department of the Interior and Local Government ukon DILG Aklan provincial director Carmilo Orbista kamana man naging bisita ro mga religious group, mga pamatan-on ag advocacy support group.
