Naka-blacklist eon sigon ro Pilipinas sa China agud nga indi pag agtunan it andang mga kababayan ag raya hay bangud sa padayun nga operasyon it Philippine Offshore Gaming Operators (POGO) sa nasyon.
Diretsahan sigon raya nga ginhambae ni Chinese Ambassador to the Philippines Huang Xilian kay Senate president Miguel Zubiri.
Nauna eon nga nagpanawagan ro China sa Pilipinas nga ibawae ro POGO, apang owa ginpamatian it nasyon rason nga napilitan sanda nga ieakip raya sa na-blacklist.
Ginrason it China nga ginabaeabagan nanda ro andang mga kababayan nga mag-agto sa Pilipinas bangud nga indi nanda masayuran kun turista gid man baea ro mga raya ukon kaibahan sa operasyon it POGO.
Kun indi man, basi masae-an sanda nga nagatrabaho sa POGO ag mabutang sa peligro nga makidnap kapareho it nagakatabu sa makaron.
Ro China eon mismo ro nagpamatuod nga may sindikato ro POGO, maskin pa nga mga kababayan nanda ro mayorya sa naga-operate kara.
Nagiging ugat man sigon ro kriminalidad nga imaw ro nasaksihan makaron sa nasyon.
Makarondaya man ro haeos nga nagakatabu sa ibang nasyon kun sa siin may operasyon man it POGO.
Basi nga gina-obra eon kita nga panaguan it pila sa wanted sa andang nasyon .
Panaguan nga nagakita pa ro andang negosyo.
Kun may mga makarondaya nga balita, indi dapat nga magbulag-bulagan bangud eamang sa kita it gobyerno nga mabo-oe halin kara.
Dapat nga timbangon ukon usisaon it mayad kon mas maabu ro perwisyo kaysa sa kapuslanan nga ginatau kara .
