KALIBO, Aklan–Kapin sa 68 nga mga depektibong kilohan sa Kalibo Public Market ro ginpangsamad gamit ro maso agud nga indi eon eubusan nga magamit sa pagpangdaya.
Ro nasambit nga mga kilohan hay ro mga ginkumpiska it mga otoridad may pilang buean ag dinag-on eon ro nagtaliwan.
Ro ceremonial crushing ukon pagsamad nga ginpatigayon sa mismong bisinidad it tindahan hay ginpangunahan it Municipal Economic Enterprise Development Office ukon MEEDO kalibo ag ni market supervisor Abel Policarpio Biyernes it agahon.
Suno kay Rosalia Tampos, presidente it fish vendors nga ro pagkakumpiska sa mga depektibong kilohan hay nagapamatuod eamang nga nagataas eon ro awareness it bumaeakae sa tamang paggamit kara agud nga indi maloko it mga bentahosong negosyante.
Regular sigon ro paglibot ukon pag-inspection it market master agud nga mausisa ro mga timbangan.
Aminado man imaw nga kaeabanan sa mga ginareklamo hay ro mga nagabaligya it isda, apang pila suno kana sa mga raya hay owa it pwesto sa tindahan ukon owa it lisensiya.
Nasayuran nga mag-eowas sa pagkumpiska hay ginapapanaugan man it multa ro mga nagagamit it depektibong kilohan.
Nauna eon nga ginrekomenda it sangguniang bayan it kalibo nga imbes nga mano-mano hay maggamit eon lang it digital nga weighing scale.
