Medyu nabutang eon man sa aeang-aeang ro New Bilibid Prison (NBP).
Raya hay matapos nga ginpahayag it nagsurender nga gunman it brodkaster nga si Percy Lapid nga sa sueod it presuhan sanda nagabaton it order ukon mandu angot sa ginpatigayon nga pagpatay sa biktima.
Ginpresentar eon ko Martes ni Department of Interior and Local Government (DILG) Secretary Benhur Abalos ro nagsurender ag nag aku nga gunman nga si Joel Estorial.
Ginsurender man kara ro gingamit nga baril nga suno sa pulisya hay nag-match man sa slug nga nabo-oe sa crime scene.
Kaibahan man sa ginpakita it nagsurender ro puea nga jacket nga suksok nana kat ginpatay ag ginbaril si Lapid.
Nagkabaeaka sigon imaw sa anang kabuhi matapos nga maboe-an it CCTV ko oras nga patyon si Lapid.
Nasayuran nga masobra sa tunga sa milyon ro ginbayad kanda kaibahan ro tatlo nga iba pang kakunchaba.
Kapin sa P140,000 pesos sigon ro anang naging hueay.
Maskin nga maabu pa ro pangutana, ginpasiguro ni Abalos nga bukon it ‘fall guy’ sa krimen si Estorial.
Sa pihak kara, owa pa it klaru kon ano ro motibo sa pagpatay.
Kadungan kara, nabutang eon man sa kontrobersiya ro Bilibid bangud nga sa sueod sigon it presuhan nagabaton it mandu ro nagsurender nga gunman.
Raya ro dapat nga mausisa ag matumod eagi it mga natungdan.
Bukas man ro pamunuan it Bilibid sa ginpatigayon nga imbestigasyon.
Sa makaron , makabig nga bukon pa it eubusan nga sarado ro kaso.
Owa pa it pinaka-utok ag motibo sa krimen.
Bantayan naton ro magiging development sa kaso.
Sa ulihi, ebidensiya ro dapat nga magpangibabaw sa pagsolbar sa raya nga kaso.
