KALIBO, Aklan—Pagasuspindihon it Qatar ro pagpasueod it mga bisita sa andang nasyon sa pag-umpisa it FIFA World Cup.
Suno kay Bombo International Correspondent Sonia Cantoba it Doha nga magapatuman ro mga otoridad sa Qatar it entry ag exit regulations pasueod ag paguwa it andang nasyon sa pag-umpisa it FIFA World Cup eakip ro pagsuspinde sa pagpasueod it mga bisita epektibo sa Nobyembre 1, 2022.
Apang ginasugid nga ro mga nagabuyot it Hayya Card hay pagapasugtan nga makasueod sa raya nga tiempo ag pwedeng magpabilin sa Qatar hasta sa Enero 23, 2023.
Ro Hayya Card hay sangka fan ID nga gin-isyu it gobyerno it Qatar para sa mga fans nga naga angkon it match tickets para sa 2022 FIFA World Cup.
Sa pihak nga parte, gindugang pa ni Cantoba nga sa makaron hay amat-amat eon nga nagahugut ro seguridad sa nasambit nga nasyon.
Mag-eowas kara, pila sa mga karsadahon nga owa masyadong gina-agyan dati hay ginbuksan agud nga malikawan ro paggutok it trapiko.
Nasayuran nga ro Qatar ro magiging kauna-unahan nga Arab country nga maga-host it World Cup, ro pinakamabahoe nga sporting event sa bilog nga kalibutan.
Ro 2022 FIFA World Cup hay maga-umpisa sa November 20 hasta December 18, kun sa siin sa opening game, magasambuwa ro host nga Qatar kontra sa Ecuador.
