Indi iga-atras it mga sardines manufacturer ro andang hirit nga dugang nga tatlong piso sa andang mga produkto maskin nga may ginplastar ro gobyerno nga solusyon sa kakueangan it supply.
Ginpunto ni Canned Sardines Association of the Philippines (CSAP) Executive Director Francisco Buencamino nga mabahoe nga problema sa produksyon ro ginapangatubang it mga canners.
Ginklaru ni Buencamino nga ro petisyon nga pataasan it tatlong piso ro Suggested Retail Price para sa canned sardines hay ko Hulyo pa ginpasaka it CSAP, pilang buean antes ro andang paandam nga makaangkon it raw material shortage sa ulihing parte it dag-on.
Kon pagasumahon sigon hay sangkiri eamang ro dugang maskin pa nga daywang dag-on eon nga owa nagahueag ro presyo it andang produkto.
Kaibahan sa mga nagduso sa CSAP nga maghirit it price hike ro nagasipa nga presyo it materyales, kapareho it lata ag tomato paste, maging it krudo tuga it nagahina nga balor it piso ag epekto it Ukraine-Russia War.
