Ginpaguwa eon ro Executive Order ni Pangueong Ferdinand Marcos Jr., agud nga eubusan nga obrahong boluntaryo ukon opsyunal eon lang ro pagsuksok it face mask sa indoor areas.
Panibag-ong paghaeuga raya nga ginaeauman it kaabuan ag nagapakita nga pabalik eon kita sa normal, matapos ro ginpatuman nga pag-instrikto sa nagtaliwan nga mga dinag-on it pandemya.
Maskin nga owa pa eubusan nga nadeklara ro ‘endemic’ sa COVID-19, nakikita ag nabatyagan nga paagto eon kara ro nasyon ag maskin ro bilog nga kalibutan.
Ro paghaeuga sa mandato it face mask sa indoor areas hay base man sa rekomendasyon it Inter-Agency Task Force (IATF), apang siyempre una sa gihapon ro mga exemptions, kapareho it ginapatuman nga bolutaryong pagsuksok it face mask sa outdoor areas.
Kinahangean sa gihapon ro pagsuksok kara sa mga pampublikong transportasyon ag medical facilities.
Laygay pa it mga health experts sa mga may comorbidities, seniors ag ro mga bukon pa it bakunado nga padayunon ro pagsuksok it face mask bilang proteksyon.
Nakadepende eon sa indibiduwal ro pagdesisyon kon kinahangean nanda nga magsuksok it face mask ukon indi sa paga-agtunan nga lugar.
Eabi eon sa mga matawo nga lugar .
Rason nga engkaso nga eubusan eon nga ipatuman ro paghaeuga sa face mask mapa-outdoor man ukon indoors, makapamayad nga pirmeng magbaeon gihapon it face mask kun engkaso.
Tama ro tantiya it pilang health experts nga posibleng antes nga matapos ro dag-on 2022, pwede eon nga owa it suksok nga face mask.
Posibleng gusto it gobyerno nga makadungan man kita sa ibang nasyon nga makaron hay eubusan eon nga nakabalik sa normal matapos nga boe-on ro mga restriksyon agud nga eubusan nga magsueong ro ekonomiya ag makabawi ro maabu naton nga mga kababayan nga naeugmok bangud sa COVID-19 pandemic.
Kunsabagay, nakadepende eon sa sangka indibiduwal kon paalin nana nga maprotektahan ro anang kaugalingon basta nga indi eang magiging pasaway.
Sambilog pa hay bakuna ro sambilog sa proteksyon it kada isaea.
