Sambilog ro ginang nga si Guia Sauza it Purok 6, Brgy. Tinigaw, Kalibo ro nakabaton it nagapadayon nga pagpanupod it relief goods it lokal nga gobyerno sa mga apektado it nagtaliwan nga maeapnagon nga baha sa bilog nga probinsya it Aklan.
Suno kana, ro food assistance nga anang nabaton nga ginakaeakipan it tunga sa tray nga itlog, canned goods, kape gatas ag bugas hay makapiyan-piyan eon sa andang pang adlaw-adlaw nga kinahang-eanon.
Kapin sa daywang dominggo eon ro nagtaliwan matapos ro pagbaha sa Kalibo hay nagapadayon pa ro pagpanupod it ayuda sa mga apektadong residente.
Suno kay Sauza, mabahoe gid nga perwisyo ro gin-aywanan it pagbaha sa andang kasapatan ag propyedad bangud nga may baboy ag manok sanda nga nagkaeamatay kamana man ro andang mga pato hay nagkaeaduea.
Mag-eowas kara, uwa man sanda it nasalbar nga kagamitan bangud nga uwa it tawo ro andang baeay sa kasagsagan it pagbaha.
Madumduman nga ginatos katawo ro nagbakwit sa gintaeana nga evacuation center it LGU Kalibo bangud nga inabot it mataas nga tubi-baha ro andang mga panimaeay.
