KALIBO, Aklan–Makaeoeo-oy ro gindangatan it sangka 5-anyos nga ungang eaeaki matapos maeumos sa sangka madaeum nga kutkot nga gina-obrang septic tank sa Brgy. Puis, sa banwa it New Washington.
Suno kay Grese Francisco Serrada, residente it nasambit nga lugar nga gin-aywan nana it makadali ro anang unga matapos nga mag-CR.
Sa anang pagbalik hay owa eagi nana raya gin-usoy bangud nga nasanay imaw nga idtu raya pirme nga nagatinir sa anang lola nga maeapit eamang sa andang baeay.
Nangawa sigon imaw matapos nga owa nagasabat ro unga nga ana eon kunta nga pagapaligsan ay maga-agto eon raya sa eskwelahan.
Mas pa imaw nga ginkoebaan kat makita ro tsinelas it anang unga maeapit sa kutkot nga nagakueob.
Mabahoe ro anang pagpati nga naghampang ro unga maeapit sa nasambit nga lugar ag aksidenteng nahueog.
Puno sigon it tubi ro nasambit nga buho tuga it pag-ilinuean.
Dugang pa it ina it unga nga ginhana pa nana raya nga salbaron pinaagi sa paghaw-as sa biktima sa buho, apang gindeklarang patay eon pag abot sa ospital.
Nasayuran nga ko buean pa it Agosto gin-obra ro buho sa likod it andang baeay ag ginbutangan eamang it abang nga kahoy para sa pagahimuon nga septic tank.
Sa makaron hay nagapangayo it bulig ro pamilya para sa pagpa-eubong it andang unga.
Ro biktima hay kamangkuran sa limang magmaeanghud.
Bangud sa insidente, ginpakamayad it pamilya nga tambakan ro buho.
