Ginklaro it Provincial Social Welfare Development Office ukon PSWDO nga pag-abot sa relief assistance nga ginakaeakipan it bugas, delata, kape ag iba pa nga ginata-o it gobyerno hay haeos tanan nga mga apektadong residente it nagtaliwan nga pagbaha hay makabaton.
Apang, pag-abot sa cash assistance nga ro pondo hay naghalin sa DSWD, sa opisina ni Cong. Carlito Marquez, ag ro dugang nga P3.4 milyon pesos maghalin sa provincial government hay pili eamang ro makabaton kara kat matawag nga eubus nga naapektuhan partikular ro mga uwa eon it baeay nga maulian bangud nga inanod it baha ag sinamad it bagyong Paeng.
Ginpaathag ni Evangeline Gallega it PSWDO Aklan nga kapin sa P15 milyon pesos ro gintaeana it gobyerno bilang emergency shelter assistance.
Base sa pinal nga datos, ro partially damage nga panimaeay hay umabot sa 4,482 kon siin sanda ro makabaton it P3,000 pesos.
Samtang, P5,000 pesos man ro mabaton it mga totally damage ro andang panimaeay nga umabot sa numero 126.
Nataeopangdan nga maabo ro nagreklamo pag-abot sa cash assistance it gobyerno sa pag-eaum nga ro tanan nga residenteng apektado it pagbaha hay makabaton it nasambit nga ayuda mag-eowas pa sa nabaton nandang food packs
