KALIBO, Aklan—Magatau it daywang adlaw nga menstruation privilege kada buean ro lokal nga gobyerno it Tangalan sa andang mga kwalipikadong babayeng empleyado.
Suno kay Tangalan Vice Mayor Gene Fuentes nga sa idaeum it ordinansa, pagapasugtan nga mag-work-from-home ro mga empleyado it daywang adlaw kada buean.
Nasayuran sigon nanda ro sakit nga nabatyagan ag body discomfort it mga babayeng may menstruation eabi eon ro mga naga-angkon it dysmenorrhea, sakit it ueo ag eawas kamana man nga ro iba hay nakakaexperiensiya it heavy wedding.
Gina engganyo man sa ordinansa ro iba pang government ag private offices sa Tangalan nga maghimo it kaparehong tikang.
Kwalipikado kara ro mga permanent ukon regular nga empleyado nga una sa reproductive ages ukon bukon it menopause ag nabdos.
Dugang pa nga sa tiempo nga may menstruation, kaeabanan sa mga babaye hay bukon it produktibo sa andang trabaho.
Kaeakip sa ordinansa ro pagtaeana it pondo it LGU-Tangalan sa igatau nga menstrual kit nga mabahoe nga bulig sa andang menstrual hygiene.
Nasayuran nga ro LGU-Tangalan hay may una nga 103 nga mga babayeng empleyado kun sa siin kapin sa lima hasta napueong porsiyento ro owa eon sa reproductive age.
Samtang, gindugang pa it bise alkalde nga ro ordinansa hay sandig sa memorandum circular it Civil Service Commission ukon CSC.
Ro nasambit nga ordinansa hay nakataeang igalunsar sa Nobyembre 28 sa pagahiwaton nga flag raising ceremony kadungan sa selebrasyon it violence against women and children week.
