Nagtapos sa patas nga 0-0 ro hampang sa tunga it Morocco ag Croatia nga ginpatigayon sa Al Bayt Stadium sa Group F match sa nagapadayon nga FIFA World Cup 2022.
Makapilang beses nga naghana nga maka-goal ro magtimbang nga koponan apang uwa gid it maskin sambilog kanda nga nagmadinaeag-on.
Libu-libong mga football fans ro nagta-o it suporta sa kada koponan kon siin hasta sa natapos ro hampang hay uwa it may naka-iskor sa mga raya.
Sa pihak nga parte, ginpahayag ni Bombo International Correspondent Renier Geronimo it Al Sadd, Doha, Qatar nga nakit-an ro kapag-on it koponan nga Morocco hasta sa natapos ro hampang.
Agud nga makapamantaw ro mga residente ag turista it prestihiyosong hampang, nagta-o it hayya card ro gobyerno it Qatar kon siin tanan nga prebilihiyo hay libre nga mai-avail it mga raya kaparehas ro pagsakay sa tren, pag-adto sa mga festival, pagpaload ag iba pang amenities nga may kaangtanan sa FIFA.
Apang, ro kabaylo kara hay kinahang-ean nanda nga mag-avail it ticket sa maskin sambilog nga match it world cup.
Ginpahayag dugang nga uwa it trabaho nga apektado sa nasambit nga nayson mag-eowas eon lang sa mabug-at nga trapiko maeapit sa nakataeanang stadium nga pagahampangan it mga raya bangud nga sarado ro mga daeanon.
Apang, kabaylo kara ro maabong negosyo nga nagtuhaw partikular sa mga lugar nga konektado sa FIFA World Cup 2022.
