Naalarma ro Philippine Chamber of Commerce and Industry ukon PCCI sa igapatuman nga P100 nga dugang panueoktan sa mga turistang patabok sa isla it Boracay para sa accident insurance.
Ginpahayag ni Elena Brugger, consultant it PCCI Boracay nga kinahang-ean nanda ro eksplinasyon maghalin sa lokal nga gobyerno it Malay angot sa nasambit nga implementasyon it ordinansa bangud dugang nga paeas-anon sigon raya sa mga turista eabi eon makaron nga may financial crisis nga ginapangatubang ro nasyon.
Sa baylo nga magdugang it burden sa mga turista, ro tutukan eon lang kunta it gobyerno ro mga programa ag proyekto nga ikamayad para sa isla.
Ayuson anay suno kana ro garbage disposal, mga drainage system, health services ag iba pa bangud nga amat-amat pa eang naton nga ginarevive ro industriya it turismo.
Ro accident insurance hay kaibahan sa andang requierements nga ginapacomply kanda it Department of Tourism ukon DOT para makapag-operate it andang negosyo sa isla rason nga bukon it makatarungan kon boe-an pa it accident insurance ro mga turista.
Sa kaabu nga tourist destination sa nasyon, base uwa eon it may maga-interes nga magsueod sa Boracay sa dugang eon man nga baeayran bangud nga ko kan-o eamang ginpatuman ro dugang nga environmental fee.
Nasayuran nga umpisa kahapon November 28 ro implementasyon it ordinansa nga magaserbe sigon raya nga proteksyon engkaso nga may matabo sa mga turista sa andang pagpabilin sa isla.
Inde eon kinahang-ean magbayad it P100 it mga turistang may una eon nga travel insurance apang pwede man sandang magbayad kon gusto nanda.
